Kaj bode z mauzolejom Zrinskih???
Minuli tjeden se je prinas v Čakovco, Međimorjo i Šenkovco (čitaj Sveti Jeleni) obilježavala 459. letnica Sigecke bitke i pogibija našega heroja, vojskovođe i hrvackoga Leonide Nikole Šubića Zrinskog. Vu Čakovco i vu Šenkovco je to organizerala Zrinska Garda šteroj so pomagali Matica i Družba, ali je, kuliko smo vidli, vu semo ipak Garda bila nejglavneša. Ak je ona Zrinska unda je to i jeni posel. Bili so pozvani, a i došli so prek svojih izaslanikov Precednik Republike Hrvacke, Precednik Sabora, Minister vanjskih poslov, Zapovjednik vojnog učilišta „Dr Franjo Tuđman“, gradonačelnik mađarskoga Sigeta, međimorski župan, čakoska gradonačelnica, šenkoski načelnik, drugi načelniki i još hajdi oni šteri poštuvlejo Zrinske. Da bi to obiležavanje bilo čim bole svetešje pobrigale so se puce iz ženskoga zbora Pučpuljike. Položili so se venci i vužgale sveče pre spomeniko Nikoli Šubičo v čakoskomo parko, a posle toga pre Mauzolejo Zrinskih, šteri je kak starec na samrti, polek kapele v Svete Jelene, a na se zadje i pre spomeniko Nikoli Zrinskom na Trgo Svete Jelene. Za Nikolo i za se poginule iz obitelji Zrinski služena je meša v župnoj šenkoskoj cirkvi.
Čuda je bilo oni šteri so došli na obilježavanje 459. obletnice, ali vam moram reči da je dosti onih šteri so došl, ali so ne delali stisko v cirkvi. Još nekaj, obljetnica Zrinskih v Županiji Zrinskih, a nišči je ne došel iz Muzeja Zrinskih, neje došla niti naša državna televizija, a bila je pozvana. Ruon tak vam morem reči da stranjski šteri dojdejo navek duže ostanejo nek domaći kak da so Zrinski ne naši međimorski.
Težake si tre zaslužiti
Kak smo rekli mi Međimorci smo organizerali 459. obljetnico pogibije Nikole Šubiča Zrinskog i jegovih ratnika, očem reči, Sigecke bitke v petek, 5. septembra, a naši sosedi Mađari so naprajli završetak obilježavanja, štero je trajalo celi tjeden, v nedelo sedmoga septembra. Mi smo pozvali sigeckog gradonačelnika k nam v Šenkovec i on je došel, a on je pozval se nas na međunarodno obilježavanje Sigecke bitke v nedelo vu Siget. A mi smo došli ili pak smo ne došli. Išla je Zrinska garda, kak i sako leto, išle so puce iz pjevačkoga zbora Pučpuljike, išlo je dosti Međimorcov šteri poštuvlejo Nikolo i ostale Zrinske, ali ga ne bilo čakoske gradonačelnice, a niti pak međimorskoga župana. A grad Čakovec i grad Siget so gradi prijateli. Znuomo mi da oni nebrejo sikam dojti, ali ak so Mađari došli v petek vu Šenkovec oni so se nadjali da bodo i naši došli v nedelo vu Siget jerbo so Gardo pitali za jiv i zato ak so gradonačelnica i župan morali iti nekam drugam pak so mogli poslati svoje zamjenike. Kuliko se ja malo razmem vu politiko pak zato so zamjeniki i zebrani kaj bodo išli tam de „glavni gazdi“ ne ftegnejo. Tak je navek bilo, što tebi dojde na fešto unda ti i jemo ideš. Več smo vidli zadji pot (čitaj: ovo leto) dok je naš Čakovec mel svoj Den grada kak je nišči ne došel od gradov prijatelov, a Čakovec ima devet prijatelov.
Nekaj se moglo videti vu Sigeto, ali to sam oni šteri so bili tam. Vu sigeckoj grackoj večnici je na glavni mesti lutka z odorom gardiste čakoske Zrinske garde, a to v Čakovco, vu grado Zrinskih nebrete videti. A kuliko znuomo Garda je vu Čakovco doma, a v Čakovco so i Zrinski bili doma i to duže od 120 let!
Novi direktor priločkoga Pre-koma je Priločanec
Priločanci so zebrali novoga direktora komunalnoga poduzeča Pre-kom štero je nejbolše poduzeče v Lepoj našoj kaj se dotikavle pobiranja, prebiranja, očem reči, sorteranja i pospravljanja smetja. Verjem kak se još navek si zmislimo kak je dugoletni direktor Pre-koma bil Siniša Radikovič šteri se je ne mogel othrvati betego šteri ga je napal pak je moral, prek reda, oditi k Božeko na račun. On je Pre-koma porihtal tak kaj je postal nejbolše poduzeče za smetje v Lepoj našoj. Nesam kanil o tomo pisati, ali sam v par naši krčmi čul „stručnjake“ kak pripovedajo da se napre zna što bode novi direktor priločkoga Komunala i kak je to gradonačelnik Ljubo porihtal za svojega kuma Đureka. A to kaj je Đuro Ujlaki diplomirani inženjer strojarstva i kaj čovek več duže od tridesti let dela v struki, očem reči, kaj se razmi v posel to nikomo nikaj. Kaj mo to se vredi ak je ne v SDP-jo kak čakoski komunalci?
Još nekaj sam moral reči ovima v krčmi pre zadjemo stolo, šteri so bili nejglasneši jerbo čim je nova runda dohajala za stol so se se dale čuli: lepo sam jiv pital, a kaj se je v čakoskomo Čakomo ne znalo napre što bode direktor, što bode koga zamenil i što bode vedril i oblačil z čakoskim smetjom. I još nekaj, to se tak dugo delalo kaj se ve več nema kam čakosko smetje voziti jerbo je Totovec došel do kraja, a smetja ga saki den se vejč i vejč. Ne bodete veruvali, Čakovčancima je čuda leži gledati v Prilok nek v Totovec. Kuliko vidimo morali bodemo oditi v Prilokkaj nas navčijo kam se štero smetje meče jerbo kuliko vidimo Ljubo i jegov kum Đuro so Priločance navčili reda i znajo kak i kam tre z smetjom!
Luka Modrič vatreni „japica“
Luka Modrič je mam posle pobjede naših labodoritašov protiv reprezentacije Crne Gore preslavil svoj 40-ti rođendan i to tam de ga je dočakal kaj bi rekli v Maksimiro na igrališto z publikom i vu slačionici za svojim „Vatrenima“. Kak se je to se lepo posložilo, rekel bi moj pajdaš Vladek: ima jeden prst gori ober nas šteri se o tomo semo briga, pak je tak i utakmica završila 4:0 za naše sam zato kaj je na semaforo svetila brojka četrdeset, a to so Lukina leta. Sima nam bi bilo lepše, a posebno Luki, da je uspel zabiti i gola na svoj rođendan, ali mo je lepo i toplo bilo pri srco dok je na semaforo svetila brojka 40. To je Lukin veliki pajdaš Ivan Perišič zabil četrtoga gola sam zato kaj se popuni čestitka. Verjem da si je Luka ne mogel poželeti lepšo čestitko, a si mi labodoritaški kibici smo mo od srca poželjeli dobro zdravje i kaj bode još dugo igral i to tak dobro kak mo to ve ide od noge. Fala ti, Luka, fala na semo tak da nam ne bode preveč teško dok bodemo zbirali nejbolšega labodoritaša Lepe naše sih vremena.
Još nekaj…
Štel bi sam reči Daliji Oreškovič, Vlatki Pokos, Severini i Jadranki Kosor (i našemo Iveko) kak so god šinfale našega izbornika Zlatkija Daličovoga „gastarbajtera“ z Livna v Lepoj našoj da so labodoritaši štere je Dalič zebral pak pobedili tak da bode ovim „pucama“ pak čuda teži pre srco. Saka pobjeda Daliča i naših Vatrenih je novi rajsnedlin vu srco ovih „puci“ štere ne trpijo Zlatkija, a niti pak jegove, očem reči, naše labodoritaše šteri so nejbolši na sveto. „Puce“ pustite labodoritanje i Daliča na miro počnite se baviti z nečim kaj vam ide od roke ili pak noge. Labodoritaši i labodoritanje je to najbrž ne. Probajte z metlom, Vlatka zna kak je to!
Jožek Radnik